Rhaid cymryd Caerdydd o ddifrif

Caerdydd 2 Manchester United 2

Adroddiad Gwenda Richards

Roedd hi’n glasur o gêm? Nac oedd. Oedd hi’n gyffrous? Oedd – a diolch i beniad gan Kim Bo-Kyung yn y munudau olaf, fe naeth Manchester United dalu am beidio cymryd Caerdydd o ddifrif.

Nid perfformiad gan pencampwyr yr Uwchgynghrair a welwyd ar y cae ddydd Sul. Roeddwn i wedi disgwyl gweld ‘master class’ o bêldroed celfydd gan Man U ond yn lle roedd na basio llawn gwallau gan Cleverley a Fellaini ynghanol y cae ac amddiffyn gwan gan adael i Kim Bo sgorio’r gôl dyngedfennol ym munud cyntaf amser ychwanegol.

Chafodd  amddiffynwyr y ddau dîm gêm foddhaol – pan fo Kim Bo a Patrice Evra, un o chwareuwyr lleia ar y cae, yn sgorio gyda’u pen, ma na rhwbeth o’i le. Gwelwyd eisiau Vidic a van Persie, oedd allan gydag anaf i’w goes.

Aeth Caerdydd i ymosod o’r eiliadau cyntaf, gyda Jordan Mutch bron â sgorio o gic gosb Peter Whittingham, ond aeth y peniad yn syth i ddwylo de Gea. Roedd Mutch yn ei chanol hi o fewn munudau ar yr asgell chwith pan gafodd ei gicio gan Wayne Rooney.

Roedd Rooney yn lwcus na chafodd garden goch. Ond ar ôl chwarter awr fe aeth pas Turner ar gyfeiliorn ac fe sgoriodd Rooney ar ôl troi fel chwirligogan yn y cwrt cosbi.

Roedd David Marshall yn brysur gan arbed yn wych o beniad Marouane Fellaini a Chris Smalling.  Cafodd Peter Odemwingie gyfle da ond aeth ei gic goes chwith ym mhell dros y bar.

Daeth gôl cyntaf Caerdydd o symudiad gwych ynghanol y cae – Whittingham i Mutch oedd yn cael rhwydd hynt rhwng ammdiffyniad a chanol cae Man U. Danfonodd y bêl yn gelfydd i draed Fraizer Campbell i sgorio’i drydedd gôl y tymor hwn.

Diffyg canolbwyntio gan yr amddiffyniad arweiniodd at gôl Evra reit ar hanner amser. Ond roedd Caerdydd ddim fel tase nhw yn barod i ildio.

Yn yr ail hanner fe aeth pas gan Tom Cleverley i gyferiad Campbell a dim ond y postyn nath stopio’r Adar Gleision rhag dod yn gyfartal.  Gyda phedair munud o amser ychwanegol roedd Man U yn meddwl, falle yn drahaus, y bydde nhw yn gallu cadw’r sgôr i’w plaid, ond unwaith eto o gic gosb Peter Whittingham fe neidiodd Kim Bo heibio pawb i sgorio er mawr rhyddhad i’r mwyafrif o’r 28,000 yn y Stadiwm. Ond roedd na mwy o gyffro i ddod. Daeth yr ‘hen ddyn’ Ryan Giggs ymlaen fel eilydd a dangos i bawb pam ei fod mor werthfawr i ‘r Red Devils. Pas wych ganddo i roi Rooney drwodd a dim ond tapio’r bel i’r rhwyd oedd angen ond fe basiodd  y bel tu ôl i Wellbeck ac i ddwylo saff Marshall.  Whew! Rhyddhad!